Hörmətli həmvətənlər, dəyərli soydaşlar!

Millətimizin iradəsinin əleyhinə olaraq, 1828 il fevralın 10-da yadellilərin imza atmış olduqları Türkməncay müqaviləsi ilə ikiyə, sonralar isə bir neçə yerə bölünərək parça-parça edilmiş vətənimiz və millətimiz hələ də ayrılıq qədərini yaşamaqdadır. Buna baxmayaraq, ayrıldığı gündən birləşmə uğrunda millətimizin apardığı davamlı mübarizə nəticəsində artıq, Azərbaycanın bir hissəsi özgürlüyünə qovuşmuşdur. Amma ayrılıq bitməmiş, Güney Azərbaycan, Borçalı, Dərbənd, Zəngəzur, Göycə, İrəvan dərdi hələ də sağalmamışdır. Bu azmış kimi bu dərdlərimizin üzərinə Qarabağ dərdi də yüklənmişdir. Araz çayı boyunca irticanın çəkmiş olduğu tikanlı məftillər arasından həsrətlə baxan bacı və qardaşlarımızın  ruhən bir birinə qovuşması qarşısında olan əngəllər hələ də rəsmi olaraq aradan qaldırılmamışdır.

İnsanların ürəyindən silinməyən doğmalıq və sevgi onları əsarətdə saxlayan qorxu hisslərini 18 il öncə, 1989 il dekabrın 31-də Arazın soyuq sularında buza döndərdi. Qəhrəman millətimizin şücaəti nəticəsində tikanlı məftillər bir gecədə yıxıldı, insanların ayrılıqda titrəyən əlləri bri-birinə toxundu, ayrılıqda döyünən ürəklər birlikdə döyündü. Ancaq bu da çox çəkmədi. Azərbaycanın biri müstəqil ola bilsə də, digəri əsarət zəncirini qıra bilmədi.

Lakin həmin gündən başlayaraq 31 dekabr dünyanın hər bir yerində yaşayan millətimiz ücün yaddaşlardan silinməyən müqəddəs bir günə, Dünya Azərbaycanlıalrının Həmrəylik Gününə çevrildi. 31 dekabr Güney Azərbaycanla Quzey Azərbaycan arasındakı sərhədlərin müvəqqəti də olsa, yox olub millətimizi bir-birinə qovuşduğu gündür. Bu gün Dünya Azərbaycanlılarının bir dövlət, bir bayraq altında yaşama istəklərinin və ümidlərinin var olduğunu, hər an bu istək və ümidin daha da artığını ifadə edən bir gündür. Bu gün vətəndə yaşayan və eləcə də, müxtəlif səbəblərdən dünyaya səpələnmiş 50 milyonluq bir toplumun həmrəyliyini ifadə edən bir gündür. İndi bu bayramda ana vətəndə və dünyanın müxtəlif ölkələrində yaşayan soydaşlarımız bir araya gələrək həmrəylik nümayiş etdirir, əsil milli törən əhval ruhiyəsi yaşayırlar.

 Demokratik Dünya Azərbaycanlıları Konqresi adından bu şərəfli, müqəddəs bayram günü münasibəti ilə dünyada yaşayan bütün azərbaycanlıları təbrik edirik.
İnanırıq ki, 18 il öncə 31 dekabrda böyük partlayışla özünü  büruzə verən bu istək və bu gün də davam edən azadlıq mübarizəsi vahid Azərbaycan dövlətinin qurulmasıyla tamamlanacaqdır. 

Demokratik Dünya Azərbaycanlıları Konqresi adından millətimiz və vətənimiz kimi ayrılmağa məhkum olunmuş təşkilatlarımızın da birləşməyə doğru atdıqları addımları alqışlayır, çox yaxın bir zamanda bütün ayrılıqlara son qoyulacağna ümid edirik. Çünki,  gücümüz birliyimizdədir. Təşkilatlarımızın birliyinə nə qədər tez nail ola bilsək, vətənizimin və millətimizin birliyinə də bir o qədər tez qovuşa bilərik.

Yaşasın Həmrəyliyimiz!

Yaşasın Birliyimiz!

Demokratik Dünya Azərbaycanlıları Konqresi

İdarə Heyətinin başqanı Məhəmməd Rza Xişti

ABŞ, 28 dekabr 2007 il
 

دئموکراتیک دونیا آذربایجانلیلاری کونقرئسی نین

31 دکابر دونیا آذربایجانلیلاری نین هم رای لیک گونو موناسیبتی ایله خالقیمیزا

موراجیعتی

  حؤرمتلی هموطنلر، دیرلی سویداشلار! 

  میلتیمیزین ایراده سی نین علئیه اینه اولاراق، 1828 ایل فئورالین 10-دا یادئللیلرین ایمضا آتمیش اولدوقلاری تورکمنجای موقاویله سی ایله ایکییه، سونرالار ایسه بیر نئچه یئره بؤلونه رک پارچا-پارچا ائدیلمیش وطنیمیز و میلتیمیز هله ده آیریلیق قدرینی یاشاماقدادیر. بونا باخمایاراق، آیریلدیغی گوندن بیرلشمه اوغروندا میلتیمیزین آپاردیغی دواملی موباریزه نتیجه سینده آرتیق، آذربایجانین بیر حیصه سی اؤزگورلوگونه قوووشموشدور. آما آیریلیق بیتمه میش، گونئی آذربایجان، بورچالی، دربند، زنگزور، گؤیجه، ایروان دردی هله ده ساغالمامیشدیر. بو آزمیش کیمی بو دردلریمیزین اوزرینه قاراباغ دردی ده یوکلنمیشدیر. آراز چایی بویونجا ایرتیجانین چکمیش اولدوغو تیکانلی مفتیللر آراسیندان حسرتله باخان باجی و قارداشلاریمیزین روحن بیر بیرینه قوووشماسی قارشیسیندا اولان انگللر هله ده رسمی اولاراق آرادان قالدیریلمامیشدیر. 

  اینسانلارین اورگیندن سیلینمه ین دوغمالیق و سئوگی اونلاری اسارتده ساخلایان قورخو حیسس لرینی 18 ایل اؤنجه، 1989 ایل دئکابرین 31-ده آرازین سویوق سولاریندا بوزا دؤندردی. قهرمان میلتیمیزین شوجاعتی نتیجه سینده تیکانلی مفتیللر بیر گئجه ده ییخیلدی، اینسانلارین آیریلیقدا تیتره ین اللری بير-بیرینه توخوندو، آیریلیقدا دؤیونن اورکلر بیرلیکده دؤیوندو. آنجاق بو دا چوخ چکمه دی. آذربایجانین بیری موستقیل اولا بیلسه ده، دیگری اسارت زنجیرینی قیرا بیلمه دی.  

  لاکین همین گوندن باشلایاراق 31 دئکابر دونیانین هر بیر یئرینده یاشایان میلتیمیز اوچون یادداشلاردان سیلینمه ین موقدس بیر گونه، دونیا آذربایجانلیلارين همرای لیک گونونه چئوریلدی. 31 دئکابر گونئی آذربایجانلا قوزئی آذربایجان آراسینداکی سرحدلرین مووقتی ده اولسا، یوخ اولوب میلتیمیزی بیر-بیرینه قوووشدوغو گوندور. بو گون دونیا آذربایجانلیلاری نین بیر دؤولت، بیر بایراق آلتیندا یاشاماق ایستکلری نین و اومیدلری نین وار اولدوغونو، هر آن بو ایستک و اومیدین داها دا آرتیغینی ایفاده ائدن بیر گوندور. بو گون وطنده یاشایان و ائلجه ده، موختلیف سببلردن دونیایا سپلنمیش 50 میلیونلوق بیر توپلومون همریلیگینی ایفاده ائدن بیر گوندور. ایندی بو بایرامدا آنا وطنده و دونیانین موختلیف اؤلکه لرینده یاشایان سویداشلاریمیز بیر آرایا گله رک همرای لیک نوماییش ائتدیریر، اصیل میللی تؤرن احوال روحییه سی یاشاییرلار.  

  دئموکراتیک دونیا آذربایجانلیلاری کونقرئسی آدیندان بو شرفلی، موقدس بایرام گونو موناسیبتی ایله دونیادا یاشایان بوتون آذربایجانلیلاری تبریک ائدیریک. 

  اینانیریق کی، 18 ایل اؤنجه 31 دئکابردا بؤیوک پارتلاییشلا اؤزونو بوروزه وئرن بو ایستک و بو گونه دك دوام ائدن آزادلیق موباریزه سی واحید آذربایجان دؤولتی نین قورولماسییلا تاماملاناجاقدیر.  

  دئموکراتیک دونیا آذربایجانلیلاری کونقرئسی آدیندان میلتیمیز و وطنیمیز کیمی آیریلماغا محکوم اولونموش تشکیلاتلاریمیزین دا بیرلشمه یه دوغرو آتدیقلاری آددیملاری آلقیشلاییر، چوخ یاخین بیر زاماندا بوتون آیریلیقلارا سون قویولاجاغينا اومید ائدیریک. چونکی، گوجوموز بیرلیگیمیزده دیر. تشکیلاتلاریمیزین بیرلیگینه نه قدر تئز نایل اولا بیلسک، وطنیزیمین و میلتیمیزین بیرلیگینه ده بیر او قدر تئز قوووشا بیله ریک.  

  یاشاسین همرای لیگیمیز! 

  یاشاسین بیرلیگیمیز! 

  دئموکراتیک دونیا آذربایجانلیلاری کونقرئسی 

  ایداره هئیتی نین باشقانی محممد رضا خشتی 

  آبش، 28 دئکابر 2007 ایل